पुणे– पुण्यात दहशतवादी विरोधी पथकाने मोठी कारवाई केली असून अतिरेकी कारवायांसाठी तरुणांची भरती करण्याच्या प्रयत्नात असणाऱ्या २८ वर्षे वयाच्या दहशतवाद्याला अटक केली आहे. पुण्याच्या दापोडी परिसरातुन त्याला अटक करण्यात आली आहे.
मोहम्मद जुनैद मोहम्मद अता असे अटक करण्यात आलेल्या व्यक्तीचे नाव असून तो मूळचा महाराष्ट्रातील बुलढाणा जिल्ह्यातील खामगाव तालुक्यातील आहे. तो दापोडी येथे नातेवाईकांकडे राहत असून एका भंगार विक्रेत्याच्या दुकानात काम करतो. सहाय्यक पोलिस निरीक्षक स्वप्नील चव्हाण यांच्या तक्रारीच्या आधारे, मुंबईच्या काळाचौकी एटीएस पोलीस ठाण्यात त्याच्याविरुद्ध एफआयआर दाखल करण्यात आला आहे.
एका गुप्त माहितीच्या आधारे कारवाई करत आज पहाटे आरोपीला अटक करण्यात आली. त्याला दुपारी ३ वाजता विशेष न्यायाधीश एस आर नावंदर यांच्या न्यायालयात हजर करण्यात आले. या प्रकरणाचा तपास करणार्‍या पोलिस निरीक्षक (एटीएस) मंजुषा भोसले यांनी न्यायालयात सादर केले की अटक आरोपी जुनैद कुळगावचा हमीदुल्ला जरगर, किश्तवाडचा आफताब शाह आणि उमर या तिघांच्या संपर्कात होता, ते तिघेही जम्मू-काश्मीरमधील आहेत. ते या प्रकरणात वॉण्टेड आहेत.
“२०२१ ते एप्रिल २०२२ दरम्यान, जरगरने ‘अन्सार गजवातुल हिंद/तौहीद’ नावाचा व्हॉट्सअॅप ग्रुप तयार केला होता आणि जुनैद देखील त्याचा भाग होता. त्यांच्यात देशविरोधी आणि दहशतवादी कारवायांवर चर्चा झाली. जुनैद आफताब शाह आणि उमर यांच्या संपर्कात होता आणि त्याने दोन व्यवहारात १० हजार रुपयेही घेतले होते. ते पाकिस्तानातील प्रतिबंधित दहशतवादी संघटना लष्कर-ए-तैयबासाठी काम करत होते. हे आरोपी भारताच्या विविध भागात शस्त्रास्त्रे गोळा करण्यासाठी आणि दहशतवादी कारवायांसाठी प्रशिक्षणासाठी नवीन सदस्य शोधत होते. जुनैद वारंवार सिम कार्ड बदलत होता. नवीन सदस्यांची भरती करण्यासाठी त्याने फेसबुकवर वेगवेगळी खातीही तयार केली आहेत”, असे इन्स्पेक्टर भोसले यांनी न्यायालयात सादर केले.
एटीएस अधिकाऱ्यांनी दिलेल्या माहितीनुसार, जुनैदने गेल्या वर्षभरात अनेकदा जम्मू-काश्मीरला भेट दिली आहे. विविध दाहक व्हिडिओ वापरून त्याचे ब्रेनवॉश करण्यात आले. त्याच्या १४ दिवसांच्या पोलीस कोठडीची मागणी सरकारी वकील विजय फरगडे यांनी केली. “एटीएसने दहशतवादी कारवायांसाठी कुठली ठिकाणे शोधून काढली आहेत का याचा तपास करायचा आहे आणि त्याच्या साथीदारांना अटक करायची आहे. त्याला काश्मीरमध्येही चौकशीसाठी नेण्यात येईल,” फरगडे म्हणाले.
आरोपीकडे कोणताही वकील नसल्यामुळे, कोर्टाने कायदेशीर मदत कक्षाचे अॅड. यशपाल पुरोहित यांना त्याचा बचाव करण्यासाठी नियुक्त केले. अॅड. पुरोहित यांनी आरोपीशी संवाद साधला आणि न्यायालयाला सांगितले की, तो कोणत्याही दहशतवादी किंवा देशविरोधी कारवायांमध्ये सहभागी नाही. “त्याच्या खात्यात पैसे ट्रान्सफर झाले नाहीत. जेव्हा तो एजन्सींच्या रडारवर आला तेव्हा इतर आरोपी त्याचे ब्रेनवॉश करत होते आणि त्याला अटक करण्यात आली,” पुरोहितने युक्तिवाद केला.
तत्पूर्वी, न्यायमूर्तींनी जुनैदला एटीएसविरुद्ध काही तक्रार आहे का, असे विचारले असता, तो नाही म्हणाला. “माझा ब्रेनवॉश झाला होता….”, जुनैद पुढे म्हणाला.
त्याच्याकडे जी काही माहिती असेल ती तपास अधिकाऱ्यांना सांगण्यास न्यायाधीशांनी सांगितले.
तपास अधिकाऱ्यांनी सखोल तपास करावा, वरवरचे काम नाही”, असे न्यायाधीश म्हणाले आणि जुनैदला 3 जूनपर्यंत एटीएसच्या पोलिस कोठडीत ठेवण्याचे आदेश दिले.
