नवी दिल्ली : अयोध्या राम मंदिर ट्रस्टच्या कामात मोठ्या प्रमाणावर आर्थिक गैरव्यवहार झाल्याचा गंभीर आरोप करत भाजपचे ज्येष्ठ नेते विनय कटियार यांनी खळबळ उडवून दिली आहे. कटियार यांच्या मते, या घोटाळ्याप्रकरणी ट्रस्टचे सरचिटणीस चंपत राय, अनिल मिश्रा आणि गोपाळ राव यांना लवकरच तुरुंगात जावे लागू शकते. या प्रकरणाची व्याप्ती इतकी मोठी आहे की, स्वतः पंतप्रधान नरेंद्र मोदी यांनी या चोरीची आणि गैरव्यवहाराची माहिती घेण्यासाठी कटियार यांच्याशी संपर्क साधला होता, असा दावाही त्यांनी एका वाहिनीशी बोलताना केला आहे.
कटियार यांनी स्पष्ट केले की, या आर्थिक घोटाळ्याचा तपास करण्यासाठी स्थापन करण्यात आलेल्या एसआयटीचा (SIT) कार्यकाळ १५ दिवसांनी वाढवण्यात आला असून, ही समिती आता सखोल चौकशी करत आहे. या तपासादरम्यान मोठ्या प्रमाणावर पैशांचा गबन (अपहार) झाल्याचे समोर आले आहे. कटियार यांच्या दाव्यानुसार, त्यांनी स्वतः मध्यरात्री दीड-दोनच्या सुमारास पंतप्रधान मोदींशी फोनवर या विषयावर चर्चा केली होती आणि तेव्हा या प्रकरणातील गंभीर बाबी समोर आल्या होत्या.
गोपाळ राव हे ‘सर्वात निरुपयोगी’ व्यक्ती
या वादाच्या केंद्रस्थानी असलेले गोपाळ राव यांच्यावर कटियार यांनी अत्यंत कडक शब्दांत टीका केली आहे. गोपाळ राव हे ‘सर्वात निरुपयोगी’ व्यक्ती असून त्यांना कोणी आणि का तिथे पाठवले, हेच समजत नाही, असे त्यांनी म्हटले आहे. एकदा दर्शनासाठी गेले असताना गोपाळ राव यांनी कटियार यांना कोणाच्या परवानगीने आलात, असे विचारले होते, ज्याचा कटियार यांनी तीव्र निषेध केला होता. अनिल मिश्रा यांच्याबद्दल बोलताना कटियार म्हणाले की, ते एक साधे गृहस्थ आहेत, परंतु चुकीच्या संगतीत अडकले आहेत. त्यांना वाचवण्यासाठी कटियार यांनी सल्लाही दिला होता, मात्र ते आता या वादात पूर्णपणे अडकले आहेत. तसेच चंपत राय यांच्या नशिबाचे ग्रह सध्या ठीक दिसत नाहीत, अशी टिप्पणीही त्यांनी केली.
दुसरीकडे, टीव्ही९ भारतवर्षच्या वृत्तानुसार, चंपत राय हे ट्रस्टचे सर्वात महत्त्वाचे निर्णय घेणारे व्यक्ती होते. ट्रस्टचे अध्यक्ष महंत नृत्य गोपाल दास हे प्रकृती अस्वास्थ्यामुळे फारसे सक्रिय नसल्याने सर्व सूत्रे चंपत राय यांच्या हातात होती. जमिनीच्या व्यवहारापासून ते भरती प्रक्रियेपर्यंत अनेक बाबतीत त्यांच्यावर संशयाची सुई आहे. एसआयटीने चंपत राय यांची दुसऱ्यांदा चौकशी केली असून त्यांच्या उत्तरांनी तपास यंत्रणेचे समाधान झालेले नाही. सूत्रांच्या माहितीनुसार, चंपत राय आणि अनिल मिश्रा यांचा राजीनामा स्वीकारला जाण्याची दाट शक्यता असून त्यांच्या जागी तीन नवीन सदस्य नेमले जाऊ शकतात.
या प्रकरणात केवळ ट्रस्टचे पदाधिकारीच नाहीत, तर अविनाश शुक्ला यालाही पोलिसांनी २४ तासांच्या कोठडीत घेतले असून लवकुश मिश्रा याच्या बेकायदेशीर बांधकामाबाबतही नोटीस बजावण्यात आली आहे. कटियार यांनी संताप व्यक्त केला की, ज्या राम मंदिरासाठी आम्ही बलिदान दिले, जिथे आमचे सात-आठ सहकारी शहीद झाले, तिथे अशा प्रकारचे आर्थिक गैरव्यवहार होणे दुर्दैवी आहे. त्यांनी माजी मुख्यमंत्री कल्याण सिंह आणि माजी पंतप्रधान नरसिंह राव यांच्या काळातील आठवणींना उजाळा देत, राम मंदिर आंदोलनाचे पावित्र्य राखणे गरजेचे असल्याचे अधोरेखित केले. सध्या अयोध्येत येणाऱ्या भाविकांमध्ये या सर्व प्रकारामुळे नाराजी असून, चंपत राय यांनी या महत्त्वाच्या मुद्द्यांवर आपल्याशी चर्चा करायला हवी होती, असेही कटियार यांनी शेवटी नमूद केले.
