पुणे(प्रतिनिधी)– गुन्हे शाखेच्या अंमली पदार्थ विरोधी पथकाकडून दोन संशयित व्यक्तींना ताब्यात घेऊन त्यांच्याकडून सहा लाख 24 हजार रुपये किमतीचा 30 किलो गांजा जप्त करण्यात आला. तर दुसऱया एका घटनेत वाकडेवाडीजवळ दोघांकडे सात लाख चार हजार रुपये किमतीचा 34 किलो गांजा आढळून आला असून, त्यांच्याकडून अंमली पदार्थाचे साहित्य जप्त करण्यात आले आहे.
याप्रकरणी पप्पू चक्रधर देवरी (वय 32, रा. कलंड, ता. रसलपूर, जि. जसपुर, ओरिसा) व चंदन सुभाष कुंवर (19,रा. जगतपूर, जि. कटक, ओरिसा) यांना अटक करण्यात आली आहे. त्यांच्याविरोधात बंडगार्डन पोलीस ठाण्यात एनडीपीसी ऍक्टनुसार गुन्हा दाखल करण्यात आला आहे. चौकशीत त्यांच्या तिसऱया साथीदाराचे नाव निष्पन्न झाल्याने दीपक बहिरा ऊर्फ बलिया (रा. भुवनेश्वर, ओडिसा) याच्या विरोधातदेखील गुन्हा दाखल करण्यात आला आहे. त्याच्याकडून आरोपींनी गांजा विक्रीस आणला. ते नेमके पुण्यात कोणकडे अंमली पदार्थाची विक्री करण्यासाठी आले होते. त्यांचे अन्य साथीदार कोण आहेत, याबाबत पोलीस पुढील तपास करत आहेत.
तर दुसऱया घटनेत अंमली पदार्थ पथक दोनचे पथक खडकी पोलीस स्टेशनच्या हद्दीत पेट्रोलिंग करत असताना त्यांना नॅशनल टुर्स ऍण्ड ट्रव्हल्स वाकडेवाडी, एसटी स्टॅण्डजवळ सार्वजनिक रस्त्यावर एक संशयित व्यक्ती अल्पवयीन मुलासोबत आढळली. त्याच्याजवळील सामानाची चौकशी करून तपासणी केली असता त्यात सात लाख चार हजार रुपये किमतीचे 34 किला गांजा आढळला. याप्रकरणी राकेश रुपसिंग पावरा (वय 25, रा. शिरपूर, दापचेपाडा, धुळे ) याला अटक करण्यात आली असून, त्याच्यासोबतच्या 17 वषीय धुळे येथील अल्पवयीन मुलास ताब्यात घेण्यात आले आहे. त्यांच्याविरोधात खडकी पोलीस ठाण्यात अंमली पदार्थ विरोधी कायद्यानुसार गुन्हा दाखल करण्यात आला आहे.
