पुणे(प्रतिनिधी): वैष्णवी हगवणे आत्महत्या प्रकरणात नाव समोर आलेल्या निलेश चव्हाण याच्या क्रूर आणि विकृत कृत्यांचे आणखी धक्कादायक पैलू उघड झाले आहेत. केवळ वैष्णवीच्या बाळाला गैरकायदेशीरपणे ताब्यात ठेवणेच नव्हे, तर त्याने स्वतःच्या पत्नीवरही अमानुष अत्याचार केल्याचे समोर आले आहे. स्पाय कॅमेऱ्यांच्या मदतीने पत्नीसोबतच्या शारीरिक संबंधांचे व्हिडिओ रेकॉर्ड केल्याप्रकरणी २०१९ मध्ये त्याच्यावर गुन्हा दाखल झाला होता, परंतु तेव्हाही पोलिसांच्या संशयास्पद भूमिकेमुळे तो मोकळा फिरत राहिला.
पत्नीच्या छळाचे भयानक वास्तव
३ जून २०१८ रोजी लग्न झालेल्या निलेश चव्हाणच्या पत्नीला जानेवारी २०१९ मध्ये बेडरूममधील सिलिंग फॅन आणि एसीमध्ये काहीतरी संशयास्पद वस्तू दिसली. निलेशने उडवाउडवीची उत्तरे दिल्याने तिला संशय आला. फेब्रुवारी २०१९ मध्ये, तिने त्याचा लॅपटॉप तपासला असता, त्यात तिच्या आणि निलेशच्या शारीरिक संबंधांचे व्हिडिओ आढळले. हे व्हिडिओ रेकॉर्ड करण्यासाठीच निलेश शारीरिक संबंध ठेवताना बेडरूममधील लाईट सुरू ठेवायचा हे तिच्या लक्षात आले. धक्कादायक बाब म्हणजे, या लॅपटॉपमध्ये केवळ पत्नीसोबतचेच नव्हे, तर इतर महिलांसोबतचेही शारीरिक संबंधांचे व्हिडिओ होते.
जेव्हा पत्नीने याबद्दल निलेशला विचारले, तेव्हा त्याने चाकूने धमकावून तिला मारहाण केली आणि तिचे पैसे व दागिने हिसकावून घेतले. तिने हे त्याच्या आई-वडिलांना सांगण्याचा प्रयत्न केला, परंतु त्यांनी तिलाच दोष दिला आणि तिचा छळ सुरू केला. हा छळ असह्य झाल्याने पत्नीने घर सोडण्याचा निर्णय घेतला.
वारजे पोलिसांची संशयास्पद भूमिका पुन्हा चर्चेत
२०२२ मध्ये, निलेशच्या पत्नीने वारजे पोलीस स्टेशनमध्ये तक्रार दाखल करत सर्व आक्षेपार्ह व्हिडिओ आणि घडलेला घटनाक्रम पोलिसांना सांगितला. पोलिसांनी निलेश चव्हाण, त्याचे आई-वडील आणि इतर कुटुंबीयांवर गुन्हा दाखल केला. मात्र, इतका गंभीर गुन्हा असूनही तत्कालीन वारजे पोलिसांनी निलेशला अटक केली नाही. उलट, त्याला अटकपूर्व जामीन मिळावा यासाठी त्यांनी संधी उपलब्ध करून दिली.
निलेशने पुणे सत्र न्यायालयात अटकपूर्व जामिनासाठी अर्ज केला, तो फेटाळण्यात आला. तरीही वारजे पोलिसांनी त्याला अटक केली नाही. त्यानंतर निलेशने मुंबई उच्च न्यायालयात अर्ज केला आणि मुंबई उच्च न्यायालयाने त्याला अटकपूर्व जामीन मंजूर केला, ज्यामुळे त्याची अटक टळली. वारजे पोलिसांची ही भूमिका अत्यंत संशयास्पद ठरली आहे.
निलेश चव्हाणची विकृती आणि आर्थिक संपन्नता
पुण्यातील कर्वेनगर भागातील औदुंबर पार्क सोसायटीमध्ये राहणारा निलेश चव्हाण हा बांधकाम व्यावसायिक आहे. त्याचे वडील रामचंद्र चव्हाण यांच्या नावावर सोसायटीत तीन फ्लॅट्स असून, पोकलेन मशीनच्या व्यवसायातूनही त्यांची आर्थिक स्थिती चांगली आहे. आर्थिक संपन्नता असूनही निलेशच्या मनातील विकृती किती गंभीर आहेत, हे या प्रकरणातून समोर आले आहे.
वैष्णवी हगवणे प्रकरणाशी संबंध आणि बाळाचा ताबा
स्वतःच्या पत्नीपासून विभक्त झाल्यानंतरही, निलेश चव्हाणचे हगवणे कुटुंबीयांशी घनिष्ठ संबंध होते. तो शशांक हगवणे आणि करिश्मा हगवणे यांचा मित्र होता. हगवणे कुटुंब वैष्णवीला त्रास देत असताना, अनेकदा कसपटे (वैष्णवीचे माहेरचे लोक) आणि हगवणे कुटुंबीयांच्या बोलणी निलेश चव्हाणच्या कर्वेनगर येथील ऑफिसमध्ये होत असे.
वैष्णवी हगवणेने २० मे रोजी आत्महत्या केली. तिच्या सासूला, नवऱ्याला आणि ननंदेला अटक झाली, तर सासरा राजेंद्र हगवणे आणि मोठा दीर फरार झाला. अशा परिस्थितीत, हगवणे कुटुंबीयांनी वैष्णवीचे नऊ महिन्यांचे बाळ निलेश चव्हाणच्या घरी ठेवण्याचा निर्णय घेतला. १६ मे नंतरचे पुढील चार दिवस हे बाळ निलेशच्या घरी होते आणि ते मोठ्या प्रमाणात रडत होते. अखेर, राजेंद्र हगवणेंच्या भावाने कसपटेंना फोन करून बाळाला त्यांच्याकडे घेऊन जाण्यास सांगितले.
बाळाचा ताबा देण्यास बंदुकीचा धाक
कसपटे कुटुंबीय सांगितलेल्या पत्त्यावर पोहोचले, तेव्हा त्यांना ते घर निलेश चव्हाणच्या वडिलांच्या मालकीचे असल्याचे आढळले. त्यांनी बाळाला स्वतःकडे देण्याची मागणी केली असता, निलेश चव्हाणने त्यांना बंदुकीच्या सहाय्याने धमकावले आणि तेथून हुसकावून लावले.
ज्या वारजे पोलीस ठाण्यात निलेशवर पत्नीचे स्पाय कॅमेरा व्हिडिओ तयार केल्याचा गुन्हा दाखल होता, त्याच पोलीस ठाण्यात त्याच्यावर पिस्तुलाच्या सहाय्याने कसपटे कुटुंबीयांना धमकावल्याचा गुन्हा नोंद झाला आहे. मात्र, बाळाला जबरदस्तीने स्वतःच्या ताब्यात ठेवल्याचा अपहरणाचा गुन्हा पोलिसांनी नोंद केलेला नाही. कसपटे कुटुंबीयांची हीच मागणी होती, परंतु तो गुन्हा दाखल झाला नाही. केवळ धमकवल्याचा गुन्हा दाखल झाला आहे, जो कायदेशीर दृष्ट्या फारसा गंभीर नाही. यामुळे, या प्रकरणातही वैष्णवीचे माहेरचे लोक पोलिसांच्या भूमिकेवर संशय व्यक्त करत आहेत.
