स्थानिक स्वराज्य संस्थांच्या निवडणुका शिवसेना (ऊबाठा) स्वबळावर लढणार? संजय राऊत यांचे संकेत

पुणे(प्रतिनिधि)— मुंबईमध्ये स्वबळावर निवडणूक लढावी असा कार्यकर्त्यांचा रेटा आहे आणि आमचीही मुंबईमध्ये निर्विवाद ताकद देखील आहे. त्यामुळे मुंबई जर आपण स्वतंत्रपणे लढलो तर चांगला रिझल्ट देऊ शकतो अशी शिवसैनिकांची भावना आहेत. मुंबई महापालिका निवडणुक हा कळीचा मुद्दा त्यामुळे ही निवडणूक स्वबळावर   लढवली जाऊ शकते असं सूचक वक्तव्य शिवसेनेचे(ऊबाठा) नेते खासदार संजय राऊत यांनी पुण्यात पत्रकारांशी बोलताना केले.

राऊत म्हणाले, विधानसभा निवडणुकीत देखील मुंबईमधून आम्ही दहा जागा जिंकल्या तसेच चार जागा कमी मतांनी आम्हाला गमवाव्या लागल्या. मात्र आगामी महापालिका निवडणुकांमध्ये मुंबई महापालिका निवडणूक कसेही करून आम्हाला जिंकावीच लागेल अन्यथा  मुंबई वेगळी केली जाईल.

ते पुढे म्हणाले, विधानसभा निवडणुकीच्या निकालानंतर सरकारचा कॉन्फिडन्स वाढला आहे. त्यामुळे राज्यातील १४ महापालिकांच्या निवडणुका लवकरच होतील अशी शक्यता आहे. त्या दृष्टीकोनातून पक्ष आणि संघटन बांधणीला सुरुवात करण्यात आली आहे. त्याचाच भाग म्हणून आज पुणे आणि पिंपरी चिंचवड मधील कार्यकर्त्यांच्या भावना ऐकून घेण्यात येणार आहे. त्यासाठी आज दिवसभर बैठका घेणार असल्याचं संजय राऊत यांनी सांगितलं.

स्वबळावर निवडणूक लढवण्याची इच्छा

स्थानिक स्वराज्य संस्थांच्या निवडणुका स्वबळावर लढाव्यात अशी चर्चा सुरू आहे. भाजपसोबत महायुतीत असताना देखील शिवसेना स्थानिक स्वराज्य संस्थांच्या निवडणुका स्वबळावर लढत होती. स्थानिक पातळीवर अनेक नेते निवडणूक लढवण्यासाठी इच्छुक असतात. त्यामुळे या नेत्यांची आणि कार्यकर्त्यांची स्वबळावर निवडणूक लढवण्याची इच्छा आहे.

…तर नक्की विजय मिळवला असता

महाविकास आघाडीच्या जागा वाटपामध्ये विधानसभा निवडणुकीत मुंबईत काही जागा आम्हाला मिळू शकल्या नाहीत. मात्र त्या मिळाल्या असत्या तर त्या ठिकाणी शिवसेनेने नक्कीच विजय मिळवला असता. खेड-आळंदी ची जागा अगदी शेवटच्या क्षणी आम्हाला मिळाली आणि आम्ही ती जिंकली. तसेच जुन्नरची जागा आम्हाला मिळाली असती तर त्या ठिकाणी देखील आम्ही नक्की विजय मिळवला असता, असं संजय राऊत म्हणाले. त्यामुळे संजय राऊत यांनी महाविकास आघाडीतील विधानसभा निवडणुकीपूर्वी झालेल्या जागा वाटपाच्या घोळावर केलेल्या भाष्यामुळे नवा वाद उफाळण्याची शक्यता आहे.