पुणे(प्रतिनिधी)—राष्ट्रवादी काँग्रेसमध्ये (NCP) सुरु असलेल्या राजकीय घडामोडींच्या पार्श्वभूमीवर, पक्षाध्यक्ष शरद पवार (Sharad Pawar) यांनी पुन्हा एकदा ‘टोकाची भूमिका घेण्याची इच्छा नाही’ असे स्पष्ट करत, राष्ट्रवादी पुन्हा एकत्र येण्याच्या चर्चांना पूर्णविराम लागलेला नाही, असे संकेत दिले आहेत. मंगळवारी पिंपरी-चिंचवडमध्ये (Pimpri-Chinchwad) भाजपसोबतच्या युतीवर तीव्र नाराजी व्यक्त केल्यानंतर, बुधवारी बारामतीमध्ये (Baramati) पत्रकारांशी बोलताना त्यांनी हे मत मांडले, ज्यामुळे राजकीय वर्तुळात पुन्हा चर्चांना उधाण आले आहे.
बारामती तालुक्यातील माळेगाव साखर कारखाना निवडणुकीत (Malegaon Sugar Factory Election) पवार काका-पुतणे पुन्हा आमनेसामने आलेत. शरद पवारांनी (Sharad Pawar) बुधवारी (१८ जून) अजित पवारांच्या (Ajit Pawar) भूमिकेवर नाराजी व्यक्त केली. लोकांना सोबत घ्यायचा दृष्टिकोन ठेवला असता तर ही वेळ आली नसती, असे पवार म्हणाले. या निवडणुकीत आम्हाला टोकाची भूमिका घ्यायची इच्छा नव्हती, असेही त्यांनी सांगितले. मात्र, हे सांगतानाच त्यांनी सध्याची परिस्थिती ‘दीर्घकालीन’ नाही असे स्पष्ट केल्याने, राष्ट्रवादीच्या दोन्ही गटांमध्ये भविष्यात सलोखा होण्याची किंवा एकत्र येण्याची शक्यता अजूनही कायम असल्याच्या चर्चांना बळ मिळाले आहे. काल त्यांच्या तीव्र नाराजीमुळे या चर्चा थांबल्याचे मानले जात होते, मात्र आजच्या त्यांच्या विधानामुळे या चर्चांना पुन्हा वेग आला आहे.
पिंपरी-चिंचवड (Pimpri-Chinchwad) येथे झालेल्या एका कार्यक्रमात शरद पवारांनी (Sharad Pawar) भाजपसोबतच्या युतीबाबत अत्यंत परखड मते व्यक्त केली होती. ते म्हणाले होते की, “सत्तेच्यासाठी भाजप (BJP) जाऊन बसायचं ही भूमिका असेल तर हा विचार काँग्रेसचा (Congress) विचार नाही”. तसेच, “कुणाशीही संबंध ठेवा, भाजपशी संबंध हा काँग्रेसच्या विचारात असू शकत नाही,” असे त्यांनी स्पष्ट केले होते. ‘संधी साधूच राजकारण’ हे आपल्याला प्रोत्साहित करायचे नाही आणि ते टाळायचे आहे, असे आवाहनही त्यांनी त्यावेळी केले होते. पवारांनी कार्यकर्त्यांना आणि नेत्यांना निवडणुकीची काळजी न करण्यास सांगताना, “विचाराने, कार्यक्रमाने आणि हिताचं रक्षण करण्याच्या भूमिकेने जे कोणी आपल्याबरोबर येत असतील, त्यांच्याशी नेते मंडळी विचार करतील,” असे म्हटले होते.
