Shantilal Suratwala has passed away –पुणे शहराचे माजी महापौर आणि राष्ट्रवादी काँग्रेसचे ज्येष्ठ नेते शांतीलाल सुरतवाला यांचे वयाच्या ७६ व्या वर्षी दुःखद निधन झाले. गेल्या काही काळापासून ते कॅन्सरसारख्या गंभीर आजाराशी झुंज देत होते. पुण्यातील रुबी हॉल क्लिनिकमध्ये त्यांच्यावर उपचार सुरू असताना शुक्रवारी (३० जानेवारी २०२६ रोजी) पहाटे त्यांनी अखेरचा श्वास घेतला. उपमुख्यमंत्री अजित पवार यांच्या निधनाच्या पार्श्वभूमीवर सुरतवाला यांच्या जाण्याने पुणे शहरावर दुहेरी शोककळा पसरली आहे.
शांतीलाल सुरतवाला यांचा राजकीय प्रवास अत्यंत प्रेरणादायी होता. १९७९ मध्ये त्यांनी पुणे महानगरपालिकेच्या निवडणुकीत ‘सिटी पोस्ट वॉर्ड’मधून पहिली निवडणूक लढवून विजय मिळवला होता. १९७९ ते २००७ या प्रदीर्घ काळात त्यांनी नगरसेवक आणि महापौर म्हणून शहराची अविरत सेवा केली. विशेषतः १९९२ ते ९३ या वर्षात त्यांनी पुण्याच्या महापौरपदाची धुरा यशस्वीपणे सांभाळली होती. ते राष्ट्रवादी काँग्रेसचे माजी शहराध्यक्ष होते आणि ज्येष्ठ नेते शरद पवार यांचे अत्यंत निष्ठावान व कट्टर समर्थक म्हणून ओळखले जात. शरद पवार आणि सुरेश कलमाडी या दोघांचेही ते अत्यंत विश्वासू मानले जात असत. पदाची कधीही स्वतःहून अपेक्षा न करणाऱ्या सुरतवाला यांना शरद पवारांनी स्वतःहून महापौरपदाची जबाबदारी सोपवली होती.
एक कल्पक प्रशासक आणि अष्टपैलू व्यक्तिमत्व म्हणून सुरतवाला यांची विशेष ओळख होती. महापौर असताना त्यांनी शहराच्या विकासासाठी अनेक अभिनव कल्पना मांडल्या होत्या. त्यापैकी त्यांची ‘रस्ते धुण्याची योजना’ कमालीची गाजली होती. कात्रज तलावाच्या पाण्याने शहरातील प्रमुख १२ रस्ते धुवून प्रदूषण कमी करण्याचा आणि वाहतूक कोंडी फोडण्याचा त्यांचा मानस होता. राजकारणाव्यतिरिक्त त्यांनी सामाजिक कार्यातही मोठे योगदान दिले असून ते प्रसिद्ध आनंद ऋषीजी ब्लड बँकचे संस्थापक होते. तसेच शहरातील गणेश मंडळाचे कार्यकर्ते म्हणूनही त्यांचा मोठा दबदबा होता. त्यांच्या निधनाने एक संयमी, अभ्यासू आणि विकासकामे तडीस नेणारा नेता हरपल्याची भावना पुणेकरांकडून व्यक्त केली जात आहे.
