पुणे- पुणे शहरात गुन्हेगारीच्या घटना वाढत असताना, ‘कोयता गँग’ [Koyta Gang]ची दहशत पुन्हा एकदा समोर आली आहे. किरकोळ कारणावरून झालेल्या वादातून भवानी पेठ [Bhavani Peth] परिसरात काही तरुणांनी मध्यरात्री हातात कोयते आणि तलवारी घेऊन प्रचंड हैदोस घातला. त्यांनी “आम्हीच इथले भाई, आमच्या नादी कोणी लागू नये” असा इशारा देत तब्बल १० ते १२ दुचाकी आणि चारचाकी वाहनांची तोडफोड केली. या प्रकारामुळे परिसरात काही काळ तणावाचे वातावरण निर्माण झाले होते. या घटनेचा एक व्हिडिओ सध्या सोशल मीडियावर वेगाने व्हायरल होत आहे.
मिळालेल्या प्राथमिक माहितीनुसार, दोन गटांमध्ये किरकोळ वाद झाला होता, जो काही तासांतच हिंसक वळणावर गेला. मध्यरात्रीच्या सुमारास, तरुणांच्या जमावाने हातात धारदार शस्त्रे घेऊन रस्त्यावर उभ्या असलेल्या अनेक वाहनांवर जोरदार हल्ला चढवला आणि त्यांची तोडफोड केली. या दहशतीमुळे नागरिकांमध्ये भीतीचे वातावरण पसरले आहे. घटनेची माहिती मिळताच पोलिसांनी [Police] तात्काळ घटनास्थळी धाव घेतली. त्यांनी परिसरात बंदोबस्त वाढवून नागरिकांना शांतता राखण्याचे आवाहन केले आहे.
पुण्यात अशा प्रकारच्या कोयत्याच्या उपद्रवाची ही पहिलीच घटना नाही. विशेष म्हणजे, काही दिवसांपूर्वीच औंध [Aundh] भागातही कोयत्याचा धाक दाखवत उपद्रव करणाऱ्या टोळीविरोधात चतु:शृंगी पोलिसांनी [Chaturshringi Police] मोठी कारवाई केली होती. २८ जून रोजी रात्री १२.१५ वाजता सात जणांच्या टोळीने काही तरुणांवर कोयत्याने आणि काठ्यांनी हल्ला केला होता. हा हल्ला पूर्ववैमनस्यातून झाल्याचे पोलिसांनी दिलेल्या माहितीनुसार समोर आले होते. त्या प्रकरणी पोलिसांनी तातडीने कारवाई करत सातही आरोपींना अटक केली होती आणि त्यांची धिंड काढली होती. आरोपींकडून एक गावठी कट्टा आणि तीन लोखंडी कोयते जप्त करण्यात आले होते.
