Sunetra Pawar : महाराष्ट्राच्या राजकारणात आज एका नवीन पर्वाची सुरुवात झाली असून सुनेत्रा पवार यांनी राज्याच्या उपमुख्यमंत्रीपदाची शपथ घेतली आहे. बुधवारी सकाळी एका विमान अपघातात राष्ट्रवादी काँग्रेसचे अध्यक्ष आणि तत्कालीन उपमुख्यमंत्री अजित पवार यांचे दुर्दैवी निधन झाल्यामुळे हे पद रिक्त झाले होते. त्यांच्या निधनाच्या अवघ्या तीन दिवसांनंतर, शनिवारी ३१ जानेवारी २०२६ रोजी राष्ट्रवादी काँग्रेसने सुनेत्रा पवार यांची विधीमंडळ पक्षनेतेपदी एकमताने निवड केली आणि त्यानंतर हा शपथविधी सोहळा पार पडला. या नियुक्तीमुळे सुनेत्रा पवार या महाराष्ट्राच्या इतिहासातील पहिल्या महिला उपमुख्यमंत्री ठरल्या आहेत.
राजभवन येथे संपन्न झालेला हा शपथविधी सोहळा अत्यंत साध्या पद्धतीने आणि केवळ प्रशासकीय औपचारिकता म्हणून पार पाडण्यात आला. अजित पवार यांच्या निधनामुळे या कार्यक्रमात कोणतीही भव्य सजावट किंवा रोषणाई करण्यात आली नव्हती. या प्रसंगी मुख्यमंत्री देवेंद्र फडणवीस, मंत्रिमंडळातील सदस्य, मुख्य सचिव, पोलीस महासंचालक आणि पवार कुटुंबातील काही निवडक सदस्य उपस्थित होते. शपथविधी दरम्यान उपस्थित समर्थकांनी ‘अजित दादा अमर रहे’ अशा घोषणा दिल्या, ज्यामुळे संपूर्ण परिसर भावूक झाला होता. या ऐतिहासिक सोहळ्यानंतर पंतप्रधान नरेंद्र मोदी यांनी सुनेत्रा पवार यांचे अभिनंदन केले असून, त्या जनसामान्यांच्या कल्याणासाठी आणि दिवंगत अजितदादा पवारांचे व्हिजन पूर्ण करण्यासाठी अथक परिश्रम घेतील, असा विश्वास व्यक्त केला आहे.
सुनेत्रा पवार यांच्याकडे अजित पवार यांच्याकडे असलेले वित्त आणि नियोजन विभाग वगळता इतर सर्व खात्यांची जबाबदारी सोपवण्यात आली आहे. त्या सध्या राज्यसभा खासदार आहेत, परंतु घटनात्मक तरतुदीनुसार त्यांना उपमुख्यमंत्रीपद टिकवून ठेवण्यासाठी पुढील सहा महिन्यांच्या आत विधानसभा किंवा विधान परिषदेवर निवडून येणे अनिवार्य आहे. दुसरीकडे, राष्ट्रवादी काँग्रेसचे (SP) अध्यक्ष शरद पवार यांनी या घडामोडींवर आपली प्रतिक्रिया दिली आहे. सुनेत्रा पवार यांना उपमुख्यमंत्री करण्याचा निर्णय राष्ट्रवादी काँग्रेस पक्षाने घेतला असून, या निर्णयाबाबत पवार कुटुंबाचा कोणताही सल्ला घेण्यात आलेला नाही, असे त्यांनी स्पष्ट केले. त्यांच्या या वक्तव्यामुळे राजकारण आणि कुटुंब यातील फरक पुन्हा एकदा अधोरेखित झाला आहे.
राजकीय वर्तुळात ‘वहिनी’ म्हणून ओळखल्या जाणाऱ्या सुनेत्रा पवार यांचा जन्म १९६३ मध्ये धाराशियेथील एका राजकीय घरात झाला. त्यांचे वडील बाजीराव पाटील हे ज्येष्ठ नेते होते, तर त्यांचे भाऊ पदमसिंह पाटील हे देखील राजकारणातील दिग्गज व्यक्तिमत्व राहिले आहेत. औरंगाबाद येथील एस.बी. कॉलेजमधून वाणिज्य शाखेची पदवी घेतलेल्या सुनेत्रा पवार यांनी बारामती हाय-टेक टेक्स्टाईल पार्क आणि विद्या प्रतिष्ठान यांसारख्या मोठ्या संस्थांच्या माध्यमातून औद्योगिक आणि शैक्षणिक क्षेत्रात मोलाचे कार्य केले आहे. तसेच, त्यांनी स्थापन केलेल्या ‘एन्व्हायर्नमेंटल फोरम ऑफ इंडिया’च्या माध्यमातून काटेवाडी हे गाव देशातील पहिले ‘इको व्हिलेज’ म्हणून विकसित करण्यात आले आहे. आतापर्यंत पडद्यामागून सूत्रे हलवणाऱ्या सुनेत्रा पवार आता राज्याच्या मुख्य प्रवाहात सक्रिय झाल्या आहेत.
